Tuesday, April 14, 2009

വിദൂരതയില്‍ ഒരു പ്രാപഞ്ചിക കരം

ഭൂമിയില്‍നിന്ന്‌ 17,000 പ്രകാശവര്‍ഷം അകലെയുള്ള ഒരു എക്‌സ്‌റേ നെബുലയുടെ ചിത്രം സമീപകാലത്തെ ഏറ്റവും വിചിത്രമായ ആകാശദൃശ്യമായിരിക്കുകയാണ്‌. നാസയുടെ ചന്ദ്ര എക്‌സ്‌റേ ഒബ്‌സര്‍വേറ്ററി പകര്‍ത്തിയ ആ ദൃശ്യത്തിലുള്ളത്‌ വിരലഗ്രങ്ങള്‍ കത്തിയുരുകുന്ന ഒരു പ്രാപഞ്ചിക കരമാണ്‌്‌.

അതിവേഗം സ്വയംഭ്രമണം ചെയ്യുന്ന ന്യൂട്രോണ്‍താങ്ങളെ പള്‍സറുകള്‍ എന്നാണ്‌ വിളിക്കുക. അത്തരമൊരു പള്‍സറാണ്‌ പ്രപഞ്ചത്തിന്റെ വിദൂരതയില്‍ അത്ഭുതദൃശ്യം ഒരുക്കിവെച്ചിരിക്കുന്നത്‌. പള്‍സറിന്റെ പേര്‌ PSR B1509-58 (ചുരുക്കപ്പേരില്‍ B1509 എന്ന്‌ വിളിക്കാം). വെറും 19 കിലോമീറ്റര്‍ വ്യാസം മാത്രമുള്ള ആ പള്‍സര്‍ തുടര്‍ച്ചയായി വന്‍തോതില്‍ പുറത്തേക്കു തുപ്പുന്ന ഊര്‍ജമാണ്‌ ചുറ്റുമുള്ള സ്‌പേസില്‍ സങ്കീര്‍ണമായ വിചിത്ര ആകൃതിക്ക്‌ കാരണം.

വിരലഗ്രങ്ങള്‍ കത്തിയെരിയുന്ന കനലുകള്‍പോലെ കാണുന്നത്‌ താഴ്‌ന്ന ഊര്‍ജനിലയിലുള്ള എക്‌സ്‌റേ മൂലമാണ്‌. ഇടത്തരം ഊര്‍ജനിലയിലുള്ള എക്‌സ്‌റേ ഉല്‍സര്‍ജിക്കുന്ന ഭാഗങ്ങളാണ്‌ പച്ചനിറത്തിലേത്‌. ഏറ്റവും ഉന്നത ഊര്‍ജമുള്ള എക്‌സ്‌റേ ഭാഗം നീല നിറത്തിലും കാണുന്നു. ഭൂമിയിലെ കണക്കുവെച്ച്‌ 1700 വര്‍ഷമാണ്‌ B1509 ന്റെ പ്രായമെന്ന്‌ ശാസ്‌ത്രജ്ഞര്‍ കരുതുന്നു. 17,000 പ്രകാശവര്‍ഷം അകലെയാണ്‌ അത്‌ സ്ഥിതിചെയ്യുന്നത്‌.

ഭീമാകരമാര്‍ന്ന നക്ഷത്രങ്ങള്‍ അന്ത്യത്തില്‍ ഇന്ധനം തീര്‍ന്ന്‌ ന്യൂട്രോണ്‍ താരങ്ങളായി മാറാറുണ്ട്‌. B1509 പള്‍സറും അത്തരത്തില്‍ രൂപപ്പെട്ടതാണ്‌. സെക്കന്‍ഡില്‍ ഏഴ്‌ തവണ ഭ്രമണം ചെയ്യുന്ന ആ പള്‍സറിന്റെ പ്രതലത്തില്‍ അതിശക്തമായ കാന്തികമണ്ഡലമുണ്ട്‌. ഭൂമിയുടേതിന്റെ 15 ലക്ഷംകോടി മടങ്ങ്‌ ശക്തമാണ്‌ അത്‌. ആ കാന്തികമണ്ഡലത്തിന്റെ ശക്തിയില്‍ ആ പള്‍സര്‍ ഭീമമായ തോതില്‍ ഊര്‍ജം നിരന്തരം പുറന്തള്ളുന്നു.


സ്വയംഭ്രമണവും അതിശക്തമായ കാന്തികമണ്ഡലവും ചേര്‍ന്ന്‌ B1509 പള്‍സറിനെ അത്‌ സ്ഥിതിചെയ്യുന്ന ഗാലക്‌സിയിലെ ഏറ്റവും കരുത്തുറ്റ വൈദ്യുതകാന്തിക ജനറേറ്ററാക്കി മാറ്റുന്നു. ആ ജനറേറ്റര്‍ ഇലക്ട്രോണുകളുടെയും അയോണുകളുടെയും ശക്തമായ പ്രവാഹം പുറത്തേക്ക്‌ സൃഷ്ടിക്കുന്നു. കാന്തികനെബുലയിലൂടെ ഇലക്ട്രോണുകള്‍ നീങ്ങുമ്പോള്‍, അവയുടെ ഊര്‍ജം വൈദ്യുതകാന്തിക തരംഗങ്ങളായി പുറത്ത്‌ വിടുകയും, ചന്ദ്രയിലൂടെ കണ്ട ദൃശ്യം രൂപപ്പെടുകയുമാണ്‌ ചെയ്യുക.

അനുബന്ധം: നക്ഷത്രധൂളികളും ഹൈഡ്രജന്‍, പ്ലാസ്‌മ എന്നിവയും ചേര്‍ന്ന്‌ സൃഷ്ടിക്കപ്പെടുന്ന നക്ഷത്രാന്തര മേഘപടലങ്ങളാണ്‌ നെബുലകള്‍. പടര്‍ന്ന്‌ വ്യാപിച്ചു കിടക്കുന്ന ഏത്‌ ജ്യോതിശാസ്‌ത്ര വസ്‌തുവിനെയും നെബുലയെന്ന്‌ വിളിക്കാറുണ്ട്‌. ആകാശഗംഗയുടെ അപ്പുറമുള്ള ഗാലക്‌സികള്‍ പോലും നെബുലയെന്ന്‌ അറിയപ്പെട്ടിരുന്നു. നമ്മുടെ അയല്‍ ഗാലക്‌സിയായ ആന്‍ഡ്രൊമിഡ ഗാലക്‌സിയെ, മുമ്പ്‌ ആന്‍ഡ്രൊമിഡ നെബുലയെന്ന്‌ വിളിച്ചിരുന്നു. ആകാശഗംഗയ്‌ക്ക്‌ പുറത്ത്‌ വേറെ ഗാലക്‌സികളുണ്ടെന്ന്‌ എഡ്വിന്‍ ഹബ്ബിള്‍ കണ്ടെത്തുന്നതിന്‌ മുമ്പായിരുന്നു അത്‌. സാധാരണഗതിയില്‍ പുതിയ നക്ഷത്രങ്ങള്‍ ജനിക്കുന്ന പ്രദേശങ്ങളിലാണ്‌ നെബുലകള്‍ കാണാറ്‌. ഈഗിള്‍ നെബുല ഉദാഹരണം. നാസ പുറത്തുവിട്ടിട്ടുള്ള ഏറ്റവും പ്രശസ്‌ത ദൃശ്യങ്ങളില്‍ 'സൃഷ്ടിയുടെ ഗോപുരങ്ങള്‍' എന്നറിയപ്പെടുന്ന ഈഗിള്‍ നെബുല ഭാഗവും ഉള്‍പ്പെടുന്നു.
(കടപ്പാട്‌: നാസ). 

5 comments:

Joseph Antony said...

ഭൂമിയില്‍നിന്ന്‌ 17,000 പ്രകാശവര്‍ഷം അകലെയുള്ള ഒരു എക്‌സ്‌റേ നെബുലയുടെ ചിത്രം സമീപകാലത്തെ ഏറ്റവും വിചിത്രമായ ആകാശദൃശ്യമായിരിക്കുകയാണ്‌. നാസയുടെ ചന്ദ്ര എക്‌സ്‌റേ ഒബ്‌സര്‍വേറ്ററി പകര്‍ത്തിയ ആ ദൃശ്യത്തിലുള്ളത്‌ വിരലഗ്രങ്ങള്‍ കത്തിയുരുകുന്ന ഒരു പ്രാപഞ്ചിക കരമാണ്‌്‌

Olive Tree said...

Hi, it's a very great blog.
I could tell how much efforts you've taken on it.
Keep doing!

ബിജു ചന്ദ്രന്‍ said...

Nice article. I read all the blogs you published and so many times i forwarded to my friends. Great presentation also. But what is the tragic part is comments are very few!

go ahead!

പാവപ്പെട്ടവൻ said...

ചിത്രം മനോഹരം പരിചയ പെടുത്തലും
ആശംസകള്‍

Jayasree Lakshmy Kumar said...

Nice info. Thank you