Wednesday, November 22, 2006

ഹിമാലയത്തിന്റെ വളര്‍ച്ച നിലച്ചു

ഹിമാലയം ഇപ്പോഴും വളര്‍ന്നുകൊണ്ടിരിക്കുന്നു എന്ന വിശ്വാസം തിരുത്താന്‍ സമയമായെന്ന്‌ ചൈനീസ്‌ ഭൗമശാസ്ത്രജ്ഞര്‍.

ഹിമാലയം വളരുകയായിരുന്നു എന്നകാര്യം പലര്‍ക്കും അത്ഭുതമായേക്കം. വളരുകയായിരുന്നു എന്നു മാത്രമല്ല, ആ മഹാമേരു ഇപ്പോള്‍ വളര്‍ച്ച നിര്‍ത്തിയിരിക്കുന്നു എന്നാണ്‌ ചൈനീസ്‌ ഗവേഷകര്‍ കണ്ടെത്തിയിരിക്കുന്നത്‌. മേഖലയില്‍ അടുത്തയിടെ വിശദമായ സര്‍വേ നടത്തിയ ഗവേഷകര്‍ പറയുന്നത്‌, ഹിമാലയവും ഏറ്റവും വലിയ കൊടുമുടിയായ എവറസ്റ്റും ഇനി വളരാന്‍ ഇടയില്ലെന്നാണ്‌.

ദിനോസറുകളുടെ കാലത്ത്‌ ഗോണ്ട്വാനാലാന്‍ഡ്‌ എന്ന പ്രാചീന ഭൂഖണ്ഡത്തിന്റെ ഭാഗമായിരുന്നു ഇന്ത്യയുള്‍പ്പെടുന്ന ഭൗമഫലകം(plate). മഡഗാസ്കര്‍ വഴി അത്‌ ഗോണ്ട്വാനാലാന്‍ഡുമായി ബന്ധപ്പെട്ടിരുന്നു. ഏതാണ്ട്‌ പത്തുകോടി വര്‍ഷം മുമ്പ്‌ ഗ്വാണ്ട്വാനാലാന്‍ഡ്‌ പൊട്ടിയടര്‍ന്ന്‌ പല ഭാഗങ്ങളായി അകന്നുമാറാനാരംഭിച്ചു. അതിന്റെ ഭാഗമായി വടക്കുകിഴക്കന്‍ ദിശയിലേക്കു നീങ്ങിയ ഇന്ത്യന്‍ ഫലകം ആറരകോടി വര്‍ഷം മുമ്പ്‌ യൂറേഷ്യന്‍ ഫലകവുമായി കൂട്ടിയിടിച്ചു. ഇരുഫലകവും അമര്‍ന്നു ചേര്‍ന്ന സ്ഥലം ഹിമാലയമായി ഉയര്‍ന്നു(കൂടുതല്‍ അറിയാന്‍: സമുദ്രജനനം കാണുക).

ഇരു ഭൂഫലകങ്ങളുടെയും സമ്മര്‍ദ്ദം മൂലം ഹിമാലയം വളരുന്ന പ്രക്രിയ ഇപ്പോഴും തുടരുന്നു എന്ന വിശ്വാസമാണ്‌ ചൈനീസ്‌ ഗവേഷകര്‍ തിരുത്തുന്നത്‌. യൂറേഷ്യന്‍ ഫലകം അകന്നു മാറുന്നതു കൊണ്ടുണ്ടാകുന്ന എതിര്‍ബലവും, ഇരുഫലവും അമരുന്നതുമൂലമുള്ള സമ്മര്‍ദ്ദബലവും ഇപ്പോള്‍ സന്തുലിതാവസ്ഥയിലെത്തിയെന്നാണ്‌ ചൈനീസ്‌ ഗവേഷകര്‍ കണ്ടത്‌.

അതിനാല്‍ ഹിമാലയം വളരുന്നത്‌ നിലച്ചു എന്നു മാത്രമല്ല, മണ്ണൊലിപ്പും മഞ്ഞുരുക്കവും മൂലം ഭാവിയില്‍ ഹിമാലയം ചെറുതാകാനും സാധ്യതയുണ്ട്‌-പ്രശസ്ത ചൈനീസ്‌ ഭൗമശാസ്ത്രജ്ഞനായ ബിയാന്‍ ക്വിയാന്റാവോ അറിയിച്ചു. ഹിമാലയം മാത്രമല്ല, ക്വിന്‍ഗായി-ടിബറ്റ്‌ പീഢഭൂമിയുടെ വളര്‍ച്ചയും ഇതുമൂലം നിലച്ചിരിക്കുന്നു-അദ്ദേഹം പറഞ്ഞു. ചൈനീസ്‌ അക്കാദമി ഓഫ്‌ സയന്‍സസിന്‌ കീഴിലെ 'ഇന്‍സ്റ്റിട്ട്യൂട്ട്‌ ഓഫ്‌ ജിയോളജി ആന്‍ഡ്‌ ജിയോഫിസിക്സി'ലെ ഗവേഷകനാണ്‌ ക്വിയാന്റാവോ.

ഹിമാലയത്തിലെ മഞ്ഞുപാളികളെ സംബന്ധിച്ച ചില മിത്തുകള്‍ ശരിയല്ലെന്നും ചൈനീസ്‌ പഠനം പറയുന്നു. ആഗോളതാപനം മൂലം അടുത്ത 50 വര്‍ഷത്തിനുള്ളില്‍ ഹിമാലയത്തിലെ മഞ്ഞുപാളികള്‍ അപ്രത്യക്ഷമാകുമെന്നാണ്‌ മുമ്പ്‌ ചില പഠനങ്ങള്‍ നല്‍കിയിട്ടുള്ള സൂചന. അത്‌ യാഥാര്‍ത്ഥ്യമാവില്ലെന്നും പഠനറിപ്പോര്‍ട്ട്‌ പറയുന്നു. വ്യാപ്തം കുറയുമെങ്കിലും, ഹിമാലയത്തില്‍ മഞ്ഞുപാളികള്‍ അവശേഷിക്കും.(അവലംബം: പി.ടി.ഐ)

3 comments:

സു | Su said...

ഹിമാലയം കാണാന്‍ ഇല്ലാതാവുമോ?

thoufi | തൗഫി said...

ഇതേക്കുറിച്ച് കൂടുതല്‍ അറിയാന്‍ ആഗ്രഹമുണ്ട്.
തുടര്‍ന്നും പ്രതീക്ഷിക്കുന്നു

ലിഡിയ said...

നല്ല വിഷയം, ഇനിയും വാര്‍ത്തകള്‍ പ്രതീക്ഷിക്കുന്നു, ഇടയ്ക്കിടയ്ക്ക് ജിയോഗ്രഫിക്കാര്‍ കാണിക്കാറുണ്ട്..

-പാര്‍വതി.